Gipuzkoa martxan kanpainaren baitan, hainbat ekintza egingo dituzte Arrasaten asteburuan, Biteri plazan jarriko duten karpa oinarri hartuta. Larunbatean eta igandean, 10:30ean, ginkana bat irekiko dute eta txikienek, gainera, puzgarriak eta pedalei eragiteko pistak izango dituzte eskura.
Larunbatean, mugikortasun aktiboa sustatzeko jardueren barruan, 11:00etan, martxa nordiko bat egingo dute eta aurrez, 10:30ean, jarraibideak emango dituzte, parte hartzeko materiala banatzearekin batera.
12:00etan, berriz, Emakume ahaztuak eta gizon on batzuk izeneko ekintza egingo dute. "Aukera ona izango da inguruko kultura-ondarea jarduera osasungarri baten bidez ikusteko", azaldu dute Aldunditik.
Igandean, kultura-pasealekua 12:00etan hasiko da, eta bi orduko iraupena izango du; kasu honetan, honako izenburu honekin: Burdinaz forjatuta, Arrasateko erdi aroaren inguruan.
Jendaurreko ordutegia larunbatean (10:30 - 14:00/15:30 – 19:30) eta igandean (10:30 – 14:00) izango da.