Haitzuloaren eremu babestuan kalterik ez dela gertatu adierazi arren Foru Aldundiak galerien zati baten suntsiketa agerikoa dela adierazi du Ezker Anitza-IUren Debagoieneko batzarrak ohar bidez. Haren ustez Foru Aldundia ez da behar bezala baloratzen ari kobaren unitatea: "Zein eremutan gertatu diren kontuan hartu gabe, kalteak larriak dira. Haitzuloak obrengatik jasan dituen kalteak gutxietsi egin dituzte eta horrekin ez da ondare geologiko eta naturala balioesten ari, bere balioa ez baita interes kultural edo arkeologikoagatik soilik babestutako eremura mugatzen".
Era berean, gogorarazi gura izan dute Udalaitz mendigune karstikoan eta Lezetxikin "aurkikuntza arkeologiko handiak" egin direla. Gaineratu dute ingurune guztia babesten ez bada aurkikuntza gehiagorako aukera galduko dela. Eta, "espazio osoa" kontserbatzearen alde agertu dira.
Horregatik, Debagoieneko Ezker Anitza-IUk kanpoko txosten bat egiteko eskatu dio Aldundiari, "Gipuzkoako ondare, kultura eta geologia-arloan izan den galera baloratzeko".
