10:00etako deialdira hutsik egin gabe agertu dira Musakolako San Isidro plazan zenbait herritar, guraso eta haurrak tarteko. Izan ere, helburu nagusia "landaketekiko sentsibilizazioa sustatzea zen", Udaleko Ingurumen Saileko teknikari Pello Garaik azaldu duenez. Jakinda landaketa bat egiteko egunik onena ez zela, partaide bakoitzak pare bat haritz landatu ditu.
Ale batzuk iaz jarritakoengatik ordezkatu dituzte, izan ere, udan sufritu egin dute zuhaixkek, batzuk ihartzeraino. Etxezarretako ingurua, 83 hektareatakoa guztira, harizti kantauriarrez hornitzeko bidean beste pauso bat eman dute: "Eremu honetan berez jaiotzen dira landare autoktonoak, urritzak eta haritzak, esaterako. Baina guk ere lagundu diezaiokegu naturari, eta halaxe egin dugu gaurkoan", adierazi du Garaik. Gogoratu behar baita Etxezarretak Urkiola eta Aizkorri-Aratz parkeen arteko korridorea osatzen duela.
Hala, programatutakoa baino astebete beranduago izan bada ere, urteroko zuhaitz landaketa herrikoia burutu ahal izan dute.