Fruitu gorriko landareak, sagarrondoak, pikuak, intxaurrak, haritzak zein pagoak zituzten salgai, besteak beste, goizean Arrasaten egin den zuhaitz azokan. Bost mintegi etorri dira eta normalean baino beranduago hasi da herritarren mugimendua, hotzagatik. Fruta-arbola bila joan dira gehienak.
Hotz egin du goizean eta hori nabaritu da Arrasateko zuhaitz azokan ere. Lehen orduan joan ohi izan dira landare erosleak horrelako azoketara, baina gaur normalean baino beranduago sumatu dute herritarren mugimendua saltzaileek. Bost mintegi izan dira: Ekoudalatx (Arrasate), Etxebarri (Gatika), Lurberry (Zarautz), Belar (Zaldibar) eta Areitio (Zaldibar).
Sagarra, intxaurra, pikua, feijoa, mahatsa, andere-mahatsa edo laranja ematen duten landareak zituzten salgai, besteak beste, eta horien bila hurbildu dira herritarrak. Pagoak ere erosi ditu bakarren batek, etxe inguruan zuhaitz autoktonoak landatuz ingurua zaintzeko helburuarekin.