Gaur egun, Arrasateko kaleetan 4.500 argi puntu daude, eta 2017az geroztik "ahalegin handia" egiten ari da Udala argiak LED teknologiara aldatzeko: "Guztira 2.680 luminaria aldatu dira, hau da, udalerriko instalazio elektrikoen % 60".
Argiteria modernizatzen jarraitzeko asmoz, Udaleko Obra eta Zerbitzuen sailak abian jarri berri du 2023an kale argiteria berritzeko hornidura-kontratazioa. LED teknologiak kalitate handiagoko argiak modu ekologikoan eta mantentze kostu baxuagoarekin funtzionatzea ahalbidetzen du. "Izan ere, gastua % 70eraino murriztu dugu kontsumo txikiari esker, eta ia ez du mantentze-lanik eskatzen", azaldu du Victoriano Fuentes Obra, Zerbitzu eta Mantentze batzordeburuak.
Hiru urterako kontratua
Lizitazioaren hasierako aurrekontua ia milioi bat eurokoa izango da, hiru urteko epean gastatzeko: 2023rako 647.000 euro, eta 2024 eta 2025erako 161.500 euro. Lehiaketara aurkezten diren enpresek eskaintzak hobe ditzakete. Kontratazioaren inguruko informazioa arrasate.eus atarian dago interesatuen eskura.
Hiru sortatan banatuko dute kontratazioa: lehen sortan luminaria konbentzionalak hartuko dituzte aintzat, bigarren sortan LED luminaria elektrikoak eta hirugarrenean LED luminaria fotovoltaikoak.