Astebete barru, azaroaren 18an, hasiko da Euskaraldiaren hirugarren edizioa. Hala, azken txanpan sartu da egitasmoa, eta, herriz herri dihardute ekintza ezberdinak antolatzen. Gune ibiltaria Oñatitik eta Eskoriatzatik igaro da aurretik, eta egubakoitz arratsaldean Arrasatera heldu da. Seber Altube plazan hartu du tokia eta Arrasateko Musikaleko banda gazteak lagunduta arrasatearrak erakarri dituzte gunera.
Belarriprest zein Ahobizi txapak jasotzeko eta entitateek identifikazioak jasotzeko aukera egon da, eta hainbatek aprobetxatu dute izena emateko ere. Horrez gain, kamiseta, jertse edota banderolak izan dituzte salgai.
Bestalde, herritarrek azaroaren 18tik abenduaren 2ra artean ekingo dioten erronkak idaztera ere gonbidatu dituzte arrasatearrak, ostean Zerrajeran egindako muralean jarriko dituzte guztiak.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.
