Parte hartzen den lehenengo aldia izanez gero, galdetegi motz batean eskatzen diren datuak bete eta ahobizi edo belarriprest rola aukeratu beharko da. "Aurreko edizioren batean parte hartu duenak, aldiz, atarian sartu eta bere parte-hartzea baieztatu beharko du soilik. Nahi izanez gero, aurretik eduki zuen rola aldatzeko aukera izango du", adierazi dute batzordetik. "Edozelan ere, aurrekoetan parte hartu duten guztiek mezua jasoko dute beraien posta elektronikoan, aurtengoa baieztatzeko aukerarekin".
Euskaraldia hasi arte, hainbat izen-emate mahai ezarriko dituzte herrian, informazioa eman, zalantzak argitu eta izen-ematean laguntzeko asmoz. Horretaz gain, arrasate@euskaraldia.eus helbidera idazteko aukera ere badago.
Gazteak Euskaraldira ekitaldia
Arrasateko Euskaraldiaren edizio honetako berrikuntza izan da Gazte Batzordea sortu izana. "Talde honen erronka, herriko gazteak Euskaraldira erakartzea da eta horretarako hainbat lan ildo jorratzen dabiltza", adierazi dute.
Horietako bat, Gazteak Euskaraldira ekitaldia izango da, irailaren 29an, 19:00etan Taupa tabernako aterpean egingo dena. "Bertan, Euskaraldian parte hartzeko aukera eta gakoen berri emango da, Etxepe eta Tabu taldeen musikaz gozatu bitartean. Gainera, izen-emate mahaia eta Euskaraldiko materiala eskuratzeko aukera ere egongo da".
Ekitaldia baliatuz, Gazte kuadrilla sarea egitasmoa aurkeztuko dute, Euskaraldian parte hartzea, gazte talde gehiagotara zabaltzeko sortu dena.
75 entitatek eman dute izena
Gogorarazi dute, bestalde, entitateen izen-ematea zabalik egongo dela urriaren erdialdera arte, hemen. Arrasaten 75 entitatek eman dute izena dagoenako. "Arrasaten arigune gehiago lortuko ditugulakoan gaude. Beraz, herriko denda, taberna, kirol zein kultura talde, enpresa eta abarrak eman dezatela izena Euskaraldian!".