Oinez mugitzea garrantzitsua dela ohartarazi dute ingurumen eskolatik. "Alde batetik, motordun ibilgailuek sortzen dituzten inpaktuak murrizteko (zarata, berotegi efektuko gasen isurketa eta abar). Bestetik, modurik osasuntsuena delako aire zabalean mugitzeko", adierazi dute. "Gainera, gure herria jasangarriagoa eta atseginagoaren alde egiteko modu bat ere bada".
Arrasate Herri Eskolako ikasleei zabaldutako ekimena da; hain zuzen ere, 2. eta 3. zikloko ikasleei. Aurten, gainera, Musakolatik abiatzeko aukera gehitu dute. Auzo horretan bizi diren ikasleak 08:30ean bilduko dira San Antolinen "eta patina eta kaskoa ekarri beharko dute garaiz eta seguru iristeko Erguineraino".
Beste ibilbideak betikoak izango dira. Bata, erdigunetik abiatuko da 08:30ean eta, bestea, San Andres auzotik, 8:40ean. Bertan Udalako Ingurumen Eskolako irakasleak egongo dira, haurrak jaso eta eskolaraino bidean laguntzeko. Dena den, ibilbidean zehar taldera gehitzeko aukera ere izango dute ikasleek.
Parte hartzeko, ikasleek izena eman beharko dute irailaren 15a baino lehen. "Parte-hartzaileen artean saritxo batzuk banatuko dira amaieran. Animatu zaitezte! Ingurumenaren eta osasunaren alde egin eta eskolara oinez joango gara elkarrekin!".