Amaia Miranda, Frank Blackfield eta MICE ariko dira, besteak beste, Kulturate Akustikoetan

Miren Narbaiza eta Joseba B. Lenoir, MICEk Bergaran emandako kontzertu batean.

Irailaren 2tik 11ra bitartean egingo dute Kulturate Akustikoak jaialdiaren XIV. edizioa. Sei kontzertu izango dira, bi asteburutan banatuta, eta guztiak Kulturateko areto nagusian egingo dituzte, 20:00etan hasita, doan. Amaia Miranda, Dos, Mice, Ghau, Maruja Limon eta Frank Blackfield izango dira jaialdiko egitaraua osatuko dutenak.

Honakoa da egitaraua:

Irailak 2, egubakoitza

Amaia Miranda gitarrista eta konpositorea da. Cuando se nos mueren los amores inperfekzioa aldarrikatu nahi duen album biluzi eta gordina da. Mozketarik gabe eta etxean grabatuta, diskoak giro soinua musikari bat gehiago bihurtzen du eta Amaiaren intimitatera bidai bat proposatzen du. Abestiek gaztarotik heldutasunerako bidean sortzen diren emozioetan sakontzen dute. Zentzu horretan, diskoak bilaketa pertsonal bati erantzuten dio baina entzulearentzat baltsamo izan nahi du ere.

Irailak 3, zapatua

DOS. Disfrutatu eta sentitzeko musika da. Súper bere lehen EPak entzule desberdinen aldetik onarpen handia izan du eta aipamen eta elkarrizketa onak bertako eta nazioarteko komunikabideetan.

Irailak 4, domeka

MICE. Miren Narbaizak bere bakarkako proiektuan sakontzen jarraitzen du. 2017an sortu zuen MICE, Napoka Iria, Perlak, Drumkopters eta Dual Split taldeetan ibili ostean. Bi argitalpen editatu ditu, izen bereko diskoa 2017an eta lau kantuz osatutako Zilar printzak EP-a 2019an. Rocka beti abiapuntu, beste estilo batzuetara hurbiltzea gogoko du MICEk, atmosfera ilunak, distortsioak, tenpo geldoak, giro arin eta argiagoekin ahaztu gabe eta ahotsa denaren gidari duela.

Irailak 9, egubakoitza

Ghau, Gartxot Unsain. Musika talde bat baino gehiago izan nahi duen proiektua da Ghau. Kantuak bestelako diziplinekin nahasteko zirrara bati jarraituz, dantza, musika, dramatizazioa eta arte plastikoen bitartez sentimendu sorta bat helaraztea da asmoa, energia transmisio berezi bat. Kantuak oinarri, bisualki indartsua den estetika bat sortzea izan da helburua, nire istorioari eurena batzea.

Irailak 10,zapatua

Maruja Limón. Maruja Limón Bartzelonako bost kidez osatutako taldea da, flamenkoaren, poparen eta erritmo latinoen artean dagoen bere bizi-musikagatik bereizten dena. 2022an, Maruja Limonek bere hirugarren diskoa aurkeztu du: Vidas (Satelite K, 2022). Energiaz, intentsitatez eta alaitasunez betetako lana. Flamenkoa, popa, erritmo latinoak eta hirikoak heldutasunez nahasten dira ahots eta bizitza multzo bat osatzen duten letrekin. Gure auzoetan bizi diren istorioak, beren orainak, iraganak eta etorkizun posibleak azalduz.

Irailak 11, domeka

Frank Blackfield. "Amerikako musikaren bihotzera egindako bidaia, disko bihurtuta". Horixe da Blackfield-en hamar abestiz osatutako azken bilduma: Still Free ‘n rockin’ (2020), Jorge Pais, Nagore Etxabe eta Nagore Michelena bidaide mundial dituelarik, Oiartzungo Mecca estudioan grabatu duen laugarrena. Rock, blues eta country-aren klasikoenen artean joan-etorria, edozeinentzako musika ezin hobea. Estatu Batuetan hogeita hiru urte egin zituen Folk eta Country-Blues musikari gisa. Orain dela ia 25 urte itzuli zen Europara. Ikus-entzuleak Atlantikoaz bestalde eramango ditu ordu eta laurden inguruko emanaldian.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.