Oposizioko alderdiak, ohar bidez, zera esan du: "EAJk askotan leporatu izan digu Construcciones Moyua SL-rekin Udalak duen kontratuko baldintzak osotasunean betetzea eskatzeagatik, hau da, obraren atzerapen egun bakoitzeko zegokion penalizazio ekonomikoa erreklamatzeko eskatzeagatik, proiektuaren kontra gaudela". Hala ere, diru publikoaren kudeaketa arduratsua egiteko "konpromiso sendoa" dutela azpimarratu dute, "behin eta berriz" azaldu moduan, proiektua edozein dela ere.
"Badirudi, oraingo honetan, Udal Gobernuak ez duela luzapen hau justifikatuta dagoenik ikusten eta, ondorioz, baldintzatutako luzapena onartzen diola, obra bukatzean zigortzeko aukera baztertu gabe. Zer gertatu da orain EAJk eta PSE-EEk iritzia aldatzeko? Beraiek ere proiektuaren kontra al daude?", nabarmendu dute.
Azkenik, adierazi dute, kudeaketa arduratsua egiten denean, Arrasateko EH Bilduk errazteko duen jarrera argi geratu zela atzo. "Hain zuzen ere, Juan Arzamendi Musika Etxea Arrasaterentzat, arrasatearrentzat eta kulturarentzat proiektu garrantzitsua dela azpimarratzen dugu beste behin ere".
