Ohitura denez, hileko hirugarren zapatuan bertako nekazari eta artisauak bilduko dituen azoka egingo da Seber Altube plazan. Bertako eta sasoiko produktuak izango dituzte herritarrek eskura, eta txakolina izango da urteko zazpigarren hilabete honetako protagonista.
Izan ere, bailarako hiru txakolin ekoizle izango dira azokako gonbidatu bereziak; zehazki, Arrasateko Kataidekoak, eta Oñatiko Belaskua eta Murgialdaikoak. Bertako txakolina dastatzeko aukera emango dute hiruek. Horrez gain, erosketa tiketarekin gilda eta gazta mokadutxoak jan ahalko dute herritarrek, baita aipatutako hiru ekoizleen produktuez osatutako bost txakolin loteren zozketan parte hartu ere.
Hiru berritasun
Txakolinaz gain, hiru berritasun izango dira uztailaren 16ko azokan. Lehen aldiz, Oñatiko Eusko Label zigilua duen eztia, Zeanuriko infusio, espezie edo intsensuak eta Mendiolako hestekiak erosteko aukera egongo da.