Uztaileko bosgarren kultur ekitaldira iritsiko da martitzenean Udazabal egitasmoa. Arrasateko Udaleko Kultura Sailak, oraingoan, hiru emakume artistak gidatzen duten pieza ikusgarria programatu du, Nudo izenekoa. "Umorea, interpretazioa eta zirkuko lurreko zein aireko teknikak uztartzen dituen ikuskizuna proposatzen dugu, ikusleari ilea harrotuko diona", azaldu dute Ana Cuervas, Maria Salmeron eta Begoña Peñaranda protagonistek.
Telon Rojo konpainiako sortzaileak dira hirurak; 2015ean hasi ziren elkarrekin lanean, eta eskutik helduta jarraitu dute gaur egun arte. Zirkua "bizitzeko filosofia" bezala ulertzen du Cuervasek; Buenos Aireskoa sortzez, 15 urte baino gehiago daramatza zirkuko profesional izan nahi dutenei irakasten Bartzelona, Tolosa (Toulouse) eta Bilbo artean. Maria Salmeronek ere Hego Amerikan deskubritu zuen diziplina artistiko hori, eta gaur egun ikastaroak jasotzen segitzen du haren espezializazioan. Uztai, trapezio, ehun eta soka artean abila eta gorputzarekin mugimendu bortitzak eta akrobaziak egiten iaioa da, berriz, Peñaranda loiutarra.
Hirurek akrobazien bitartez lagunduko dute elkar, Biteriko gasolineraren egitura aprobetxatuta, publikoari harridura transmititzeko. Eta barre eginarazteaz ere ez dira ahaztuko, elkarrizketa eta eszenaratze bitxien bitartez. Elementu horiekin guztiekin osatuko dute altura handiko esperientzia "zerutiarra".
Afrikako danborrak
Udazabalen hurrengoa Ugandan Sticks eta haien danborrak ikuskizuna izango da, hilaren 20an, Monterrongo parkean. Harreman eta Mundukide elkarte solidarioei laguntzeko asmoz, 10 euro balioko du sarrerak. Ibai-arteko komertzioetan erosita, doako sarrerak lortzeko aukera egongo da.