Orotariko estilo eta gustu artistikoen eszenatoki bilakatuko da Gudarien Plaza San Andresko jaien lehen egunaren aitzakiapean. Lau ikuskizun desberdin egongo dira festazaleen gozamenerako apirilaren 29ko gauean. Drag-showa egingo dute Albina Stardust eta Divina Comedia izenaz ezagutarazten diren bi artistek. Fran Pedrosa Ixsyroi rap-kantariak bere errepertorioa eskainiko du. Berau bakarka arituko da, baina raparen bueltan mugitzen den talde bat ere igoko da oholtzara: Zulo Crew; Pier ZC, Ali ZC eta Kate ZC dira zigilu horren atzean daudenak. Bestalde, zapatuan ez ezik (ikus erlazionatutako artikulua), barikuko hitzordu horretan ere egingo diote rock doinuei tokia, Wood Strings taldeak bere kantuak joko baititu, tartean, iaz kaleratutako Isladak diskokoak.
Tokiko sortzaileen aldeko apustua egin du San Andresko jai batzordeak egun horretarako, protagonista guztiek baitaukate lotura Arrasaterekin.