Askapenak antolatuta eskaini du hitzaldia Ibai Trebiñok. Mikel Arregirekin batera egindako dokumentalak, gaur egun, "balio handiagoa" duela adierazi du: "Paradoxikoa izan daiteke, baina gaur egun dokumentalak balio bat du. Azken batean, gertatzen ari dena ulertzeko garrantzitsua da lehen zer gertatu den ulertzea. Horregatik ari gara dokumentala berriz ere erakusten, azken urteetan Ukrainan gertatutakoa ulertzeko. Gerra ez da gauza berria, bai errusiarren erasoa, baina hau duela zortzi urte hasitako gerra da. Garrantzitsua da dena testuinguruan jartzea, ulertzeko nondik datorren gerra hau".
"Informazio partzializatua"
Hedabideek gaiari emandako trataera eta jarraipenaren inguruko hausnarketa ere egin du: "Lehen gerra zibil bat zen, Ukraina ekialdeko errusiar hiztunak ziren erasotuak izaten ari zirenak eta gaur egun Ukraina osora hedatu da eta bestelako dimentsio bat hartu du. Medioetatik eman zaion zabalkundeak zerikusi handia du horretan. Komunikabideek lehen isilarazi dutena, zortzi urtez, orain gure komunikabide gehienetan agertzen da".
Une honetan herritarrek informazio "partzializatua" jasotzen dutela salatu du Trebiñok: "Gure helburua bi aldetatik gatazka hori nola bizi zen erakustea zen. Gaur egun, zoritxarrez, ikusten dugu alde bakarreko informazioa ematen dela. bereziki Ukrainaren aldeko informazioa, nolabait esateko". "Linea ofizialetik irten diren kazetariek jasandako errepresioa" ere salatu du: "Pablo Gonzalez kazetaria kartzelan dago, eta bere askatasunaren alde lanean jarraituko dugu".
