Azken horiei, Arrasateko Udalak lagunduko die, tranpak utzi eta barrura botatzen zaien erakartzeko likidoa emanez. Haiek, trukean, udalak egiten duen bezala, astero-astero tranpak berrikusi eta harrapatutako liztor kopuruaren datuak jasoko dituzte, ondoren udal teknikariak datuok bildu eta Gipuzkoako Foru Aldundira bidaltzeko.
Bi sistema erabiliko dituzte
Aurten, iaz bezala, bi tranpa mota erabiliko dituzte: selektiboa, EVA deritzana (liztorrak bakarrik harrapatuko lituzkeena) eta AVISPACLAC erakoa. Azken horrek, intsektu mota guztiak harrapatzen ditu "inongo bereizketarik" egin gabe, "nahiz eta liztorrak harrapatzeko, bestea baino askoz eraginkorragoa izan", Xabier Herrarte udal teknikariaren arabera. "Aurten ordea, azken honi moldaketa bat egin diogu, ea neurri batean, selektibo bihurtzea lortzen dugun", gaineratu du.
Iaz hasi ziren EVA erako tranpa berria frogatu, bien tranpen arteko aldea ikusi eta datuak biltzen. "Foru Aldundiak asko eskertu du Arrasateko Udalak egindako ahalegina, eta horren lekuko, Aldundiak urtero argitaratzen duen Vespa velutina liztorren desaktibazioaren emaitzen txostenean, datuok azaldu eta nabarmentzen dira. Bide batez, aurten ere, ahal dela, berdin jarraitzeko eskatu digute, eta gure partetik ahal dena egiteko prest azaldu gara".
Herrartek nabarmendu duenez, helburu bakarra Vespa Velutina edo liztor beltza harrapatzea da, gainontzeko basa animaliei "ahalik eta kalte txikiena" eraginez. "Horregatik, tranpa hauek jartzeak ezin dezake baldintzatu gainerako espezieen biziraupena. Bestela, liztor beltzak berak eragin dezakeena baino kalte handiagoa eragin dezakegu guk".
Herritarren laguntza eskatu dute
Urtero moduan, herritarren laguntza eskertu eta parte hartzea bultzatu nahi du Arrasateko Udalak. Horretarako, hainbat telefono zenbaki jarri ditu herritarren eskura, "arazoren bat izan edo habiaren bat ikusiz gero", deitzeko.
Harremanetarako kontaktuak:
- BAZ ……………………….……...943 25 20 00
- UDALTZAINGOA……………..943 25 20 10
- UDAL TEKNIKARIA…………..628 11 56 73