Proiektu politikoa "herritarrekin partekatu eta modu kolektiboan eraikitzeko", azaroan aurkeztu zuen Entzunez Eraiki dinamika Xabier Barandiaran Euzkadi Buru Batzarreko Berrikuntza Politikoko arduradunak. Lurraldez lurralde egingo da "entzute aktiboaren, elkarrizketaren eta lankidetzaren" dinamika urria bitarte, jeltzaleen Agenda 2030 proiektuko erronkekin lotura duten bost lan-ildo edo aztergai nagusirekin: gizarte-politikak, klima-aldaketa, sustapen ekonomikoa, gobernantza eta euskara.
"Gure ereduaren nortasun ikurra diren elkarrizketa eta adostasunen bilaketa indartu nahi dugu", adierazi du prentsa ohar bidez Imanol Lasa GBBko Berrikuntza Politikoko arduradunak, "gure erronkei izaera kolektibotik eta komunitate bateko kide izatearen zentzutik aurre egitean datzan eredu hori, alegia".
Zapatuan, Arrasaten
Politika sozialak landuz, Errenterian abiatu zen joan zen zepatuan Gipuzkoako dinamika. Arrasateko Abaroa zahar egoitzan izango du zapatuan bigarren geldialdia. 9:30etatik aurrera, eredu sozioekonomikoaren etorkizuna izango dute aztergai, besteak beste, Jabier Larrañaga Ekonomi Sustapeneko eta Proiektu Estrategikoetako diputatuarekin eta Maria Ubarretxena Arrasateko alkate eta dinamikako garapen ekonomikoaren arloko arduradunarekin.
Oharrean adierazi dutenez, "afiliatu alderdizaleei zein herritar guztiei" dago irekita saioa.
