"Salerosketak, tramite burokratikoak, bankuetako tramiteak, tramite laboralak, eskola eta abar geroz eta gehiago digitalizatzen ari den garai hauetan, egunetik egunera, desoreka eta arrakala amaigabea eragiten ari gara herritar zaurgarrienen kalterako", diote. "Ez gaude digitalizatze prozesu horren aurka; bai ordea, digitalizatze hori pribilegio bihurtuko bada. Digitalizatzea bai, beti ere, horretarako, baliabide digitalak denon eskura jartzeko gai bagara edota horiek eskuratzeko bideak errazteko gai bagara".
Elkartean maiz artatzen dituzte baliabide falta horrek eraginda edozein tramite digital egiteko beharra duten herritarrak. "Zer esanik ez, seme-alabei eskola lanetan laguntzeko izugarrizko zailtasunekin aurkitzen diren emakumeak. Eta noski, bizi dugun osasun krisialdiak, baliabide horien ezinbesteko beharra areagotu du eta baita agerian utzi ere digitalizatze prozesu hau pribilegio bihurtu dela askorentzat".
Hori kontuan izanik, herriko hainbat enpresekin harremanetan jartzeaz gain, arrasatearrei ere kolaborazioa eskatu diete. "Jarri gurekin harremanetan eta, pozarren, eskaintzeko duzuena gure bulegoan, Pablo Uranga 4, behean, jasoko dugu".