Elisa Sainz de Murieta EHUko ikertzaile eta irakaslea da Ekonomia Aplikatua departamentuan eta Basque Centre for Climate Change (BC3) ikerketa erakundeko ikertzaile atxikia. Era berean, Geologia Zientzietan lizentziaduna, EHUn (2001). Ondoren, Ingeniaritza eta Ingurumen Kudeaketako master bat egin zuen Madrilgo Industria Antolakuntzarako Eskolan (EOI, 2002), eta hiru urtez aritu zen ULMA industria taldean.
2005ean, Eusko Jaurlaritzako Ingurumen Sailean lanean hasi zen, Biodibertsitate eta Ingurumen Partaidetzarako zuzendari gisa. Etapa horretan, zientziak erabakiak hartzeko oinarri gisa duen garrantzia bertatik bertara ikusteko aukera izan zuen, eta, horregatik, Jaurlaritzan amaitu ondoren, ingurumen- aldaketei buruzko master bat ikastea erabaki zuen (UPV/EHU, 2010), doktoretzarako sarbidea eman ziona.
BC3 erakundean 2010ean hasi zen lanean, eta bertan egin zuen doktore tesia (2016), klima-aldaketak eragindako itsas-mailaren igoerak euskal kostaldean sortu ditzakeen inpaktu eta kalte ekonomikoak aztertuz. 2017tik 2019ra Grantham Research Institute (London School of Economics) institutuko ikertzaile bisitaria izan zen. Gerora, BC3ko ikertzaile bezala aritu da, klima-aldaketaren inpaktuak ikuspegi sozioekonomikotik aztertuz, baita egokitzapen-politikak ere, eta hainbat ikerketa esparrutan lan egiten du (adibidez, COACCH, Gobernadapt).
Hemen dago ikusgai Ttap aldizkariak irailean egindako elkarrizketa.
