2021eko Zuhaitz Eguneko azoka bertan behera gelditu zen pandemiaren eraginagatik, baina aurten, hileko hirugarren zapatuko baserriko produktuen azokak mintegien presentzia izan du beste behin. Lau mintegi (Lurberry, Etxebarria, Belar eta Areitio) gerturatu dira Sebero Altubeko plazara euren zuhaitz, zuhaixka eta fruitu-arbolen sorta zabala eskaintzera.
Izan ere, zuhaitzak landatzeko garaia hau izaten da, eta azokan gora eta behera ibili diren herritar askok erositakoak egun hauetan landatuko dituztela azaldu dute.
Landaketa Etxezarreta inguruan
Goizeko 10:00ak pasatxo abiatu dira 40 bat lagun Musakolatik, hotzari aurre eginez, Etxezarreta inguruko mendi magaletara. Etxezarreta inguruan pinudia zegoen, baina baso autoktonoa osatzen zuten hariztia eta bertako beste espezie batzuk. Hori dela eta, gaurkoan haritzak, batez ere, eta endemikoak diren beste espezie batzuk landatu dituzte auzolanean.