Berrikuntza modura, Arrasateko Udalak lehen aldiz Gabonetako Leiho eta Balkoien Lehiaketa antolatu du 2021 honetan. Zortzi etxebizitzak eman zuten izena sariketan, eta arrasatearrek webgunearen bidez emandako botoek erabaki dute irabazlea.
Zenbatutako 313 botoen artean, Charo Gomezen Deba Etorbideko balkoiak jaso du herritarren atxikimendu handiena; herriko komertzioetan gastatzeko 300 euroko saria jaso du, beraz. Irabazleak Goienari adierazi dionez, 13 urte daramatza Gabonen bueltan balkoia atontzen: "Apaingarri ezberdinak erosi, eta nik neuk hartzen dut etxeko leihoak egokitzeko lana. Mimoz egiten dut, eta denbora eskaintzen diot". Ez da, gainera, gisa honetako lehiaketa bat irabazten duen lehen aldia; hots, auzoan antolatutako txapelketa ere irabazi zuen pasa den urtean.
Bozka eman duten herritarren artean, berriz, 100 euroko bonu bat zozketatu du Udalak, eta Edurne Elvira izan da zorteduna.
