"Ez dugu Gobernuaren eredu fiskala partekatzen, ezta zerbitzuak kudeatzeko jarraitzen dituzten irizpideak ere. Laburbilduz, ez ditugu Gobernu honen lehentasunak babesten, gure politika egiteko eredutik oso aldenduta daudelako", azaldu dute. "Hori datu objektiboekin argudiatuko dugu: Gizarte zerbitzuak, Berdintasuna eta Enplegua sailei bideratutako partidak bateratzen baditugu, ez dira heltzen aurrekontuaren %15era. Baina Hirigintza eta Obra sailetako aurrekontuak gehitzen baditugu, aurrekontu osoaren %47 da".
38 proposamen horietako bat izan da gizarte zerbitzuetara bideratutako laguntza bikoiztea. "Arrasatear askok arazo ekonomiko larriak dituzte eta 37 milioi euroko aurrekontua dela kontuan izanik, uste dugu laguntza sozialak handiagotu beharko liratekeela, beharrizan larriak dituztenak hobetu bizi daitezen".
Horrez gain, aterpetxearen proiektua ere proposatu du ezkerreko koalizioak. "Mankomunitateak mapa osatzen duen arte, Arrasaten gaueko aterpetxe bat beharrezkoa da, emergentziaren bat daukatenek eta kalean daudenek aterpe bat izan dezaten. Gaur egun ez dago inolako udal baliabiderik beharrizan horiek asetzeko eta, dauden bakarrak, borondate politikoaren araberakoak dira, hotel bat ordaintzeko edota, besterik barik, baliabiderik ez dagoela komunikatzeko".
Autobusaren inguruko hainbat proposamen ere jaso dituzte. "Batetik, herribusaren zerbitzu publikoa asteburuetara eta jaiegunetara zabaltzea, prezioa jaitsiz. Hau da, prezio sinbolikoa izatea, gehienez 0,50 euro ordainduta, herritar guztiek aukera izan dezaten autobusa erabiltzeko eta, modu horretan, autoaren kontsumoa jaitsiz". Azkenik, herribusa Gesalibarrera iristea ere eskatu dute.
