"Pentsio publiko, duin eta bizitzeko adinakoen alde" borrokan jarraitzen dute pentsiodunek

Azaroaren 22an onartu zen pentsioen balioa handitzeko lege proiektua, eta horren baitan dago Belaunaldien arteko Ekitatearen Mekanismo berria (BEM). "Horrek Gizarte Segurantzaren Erreserba Funtsaren diru-sarrerak handitzen baditu ere, ez du bermatzen Prebentzio Zerbitzu Publikoaren finantzaketa nahikoa", azaldu dute pentsiodunek.

Era berean, Kongresuko Batzordean onartutako zuzenketen "alderdi positiboak" kontuan hartuta ere, "zuzenketa horiek ez dute aldatzen pentsio publiko duin eta gutxienekoen sistema publikoa bermatzeko aukera galdua den erreforma baten izaera", pentsiodunen esanetan. "Indarrean dauden murrizketak berresten ditu, beste batzuei atea irekitzen die eta Pentsio Publikoen Sistemaren pribatizazioa sustatzen du".

Gizarte Segurantzaren kontuen auditoria bat egitea ondo iruditzen zaiela nabarmendu dute, "baina eskatu behar da Kontuen Epaitegiaren txostena berehala gauzatzea". Txosten horren arabera, 104.000 milioi euro itzuli behar zaizkio Gizarte Segurantzari, "gobernuek 'desegokitzat' jotzen diren beste gastu batzuk ordaintzeko erabiltzen baitituzte". Modu horretan, azpimarratu dute zuzenketa hori "paper bustia" izango dela. "Kokoteraino gaude inoiz betetzen ez diren promesez".

Arrazoi horiengatik, uko egiten diote "pentsioen erosteko ahalmena mantentzea bermatzen ez duen" lege-proiektu bati, haien esanetan, "indarrean dauden murrizketak finkatzen dituelako, 1.080 euro baino askoz gutxiagoko pentsio minimo miserableak betikotzen dituelako, genero arrakalaren aurka neurririk hartzen ez duelako, 40 urte baino gehiagoko kotizazio-karrerak dituzten langileak zigortzen dituelako eta erretiro aurreratua eta Pentsioen Sistema Publikoa pribatizatzea sustatzen dituelako".

Datorren astelehenean, elkarretaratzerik ez

Bestalde, datorren astelehenean, abenduak 6, ez dute elkarretaratzerik egingo. "Hurrengoa abenduaren 13an egingo dugu eta ondoren atseden hartuko dugu urtarrilaren 13ra arte".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.