2020ko otsailean kaleratu zuen post-rock estiloko bandak Das Cabinet des Dr. Caligari diskoa, bere zazpigarren albuma. Izen bereko film espresionista eta mutuari soinu banda propioa jarri zioten modu horretan. Zuzenekoei begira, 101 urte bete dituen pelikula proiektatu bitartean interpretatzen dituzte abestiak, momentu emotibo bezain bereziak eskainiz publikoari. Esperimentu horren emaitza nolakoa den frogatu nahi duenak Amaia antzokira gerturatu besterik ez dauka, bihar, zapatua, 19:30ean hasita.
Etortzeko gogoz
Filomena denboraleagatik urtarrilekoa bertan behera gelditu aurretik Euskal Herrira etortzeko "irrikan" bazeuden, zer esanik ez hamar hilabeteren ostean. Bien bitartean, baina, ez dira gora begira egon, HEX izeneko diskoa kaleratu baitute. Hori Gasteizko Hell Doradon aurkeztu zuten hilaren 6an. Arrasateko egonaldiaren ostean, Donostiako Victoria Eugenian eta Bilboko Arriagan joko du Madrileko taldeak.
