"Euskal presoek eta haien senideek jasaten dituzten eskubide urraketak" direla eta, elkartasuna adierazi eta haien egoera salatzea da zapatuko martxan egingo dutena, Sare Arrasateko kideek azaldu dutenez. "Martxa horretan, gaixo dauden presoak, 70 urtetik gorakoak eta zigorraren hiru laurdena beteta dutenak etxeratzea eskatuko dugu, baita gradu progesiboa aplikatuz, presoek baimenekin ateratzeko aukera izatea ere". Halaber, euskal presoei aplikatzen dieten salbuespenezko espetxe politika indargabetzea ere eskatzen dute, 7/2003 legea esaterako, eta baita bizi osoko kartzela zigorra salatzea eta presoen eskubideak bermatu daitezen ere.
PP eta Vox alderdien ekitaldiak
Sortutako polemika eta zurrumurruen harira, PPk eta Voxek iragarri dute Arrasaten mobilizatuko direla zapatuan. Euskadiko Alderdi Popularrak elkarretaratzea egingo du San Andresen, Ortega Lara bahituta eduki zuten lantegiaren aurrean, 10:30ean, Carlos Iturgaiz buru dela. Vox alderdi ultraeskuindarrak, berriz, Garibai etorbidean egingo du elkarretaratzea, 12:00etan, eta Santiago Abascalek iragarri du han izango dela.