Arrasatearra 1990eko apirilaren 2an atxilotu zuten, eta 30 urteko zigorraz gain, beste hamaika urteko zigorra ezarri zioten gerora. Bigarren zigor hori baieztatu bitartean, baina, behin-behineko espetxealdian egon zen eta hori da, hain zuzen, deskontatu diotena. "Ezin zuten besterik egin", adierazi dute Saretik.
Horren harira, nabarmendu dute 41 urte horietatik hiru laurdenak beteta dituela dagoeneko eta kalean egon beharko lukeela. "Baimenak eskatzen ditu, baina ukatu egiten dizkiote. Dena den, jarraitu beharra dauka, onartzen dioten arte. Legea aplikatzea besterik ez dugu eskatzen".
Gaur egun, 62 urte ditu eta aurtengo udaberrian, Puerto de Santa Mariatik Leongo Mansilla de las Mulaseko espetxera lekualdatu zuten. 2029rako dago aurreikusita bere kaleratzea.
Elkartasun martxa, irailaren 18an
Hain zuzen ere, Paroten askatasuna eskatzeko elkartasun martxa egingo dute hilaren 18an. Horri lotuta, Carlos Iturgaiz Euskadiko Alderdi Popularreko presidenteak iragarri du, martxa burutzen bada, "biktima guztiak oroitzeko" ekintza bat egingo dutela haiek ere Arrasaten.
