Osasun adituek gomendatu dute uneoro maskara garbi bat soinean eramateko baldintzak betetzen ez direnean musukua jarri behar delako. Hori bai, Debagoieneko ospitaletik mezu lasaigarria helarazi nahi izan du Iñaki Peña medikuak.
Urtebete eta hiru hilabete
2020ko martxoaren 21ean ezarri zuen maskara derrigorrez jartzeko neurria Espainiako Gobernuak. Aire zabalean eta erabilera publikoa duten gune itxietan izan zen derrigorrezkoa egun horretatik aurrera, 6 urtetik gorakoentzat. Hasieran, bi metroko segurtasun distantzia ziurtatu ezin zenerako agindu zuten, baina gerora ohikoa bilakatu da maskara kalean, mendian eta hondartzan, parkeetan eta terrazetan, udako oporretan zein eguberrietako ospakizunetan, COVID-19aren transmisioa eteteko.
Baina badirudi maskararen presentzia murrizten joango dela aurrerantzean eta, Iñaki Peñaren arabera, arauak lausotzen joango dira laster. Gainera, aurtengo uda zein udazkena nabarmen hobeak izango direla dio, ez da-eta olatu berririk espero.
Bi aste COVID-19agatik ospitaleratu barik
Debagoieneko ospitalean lanez lepo dabiltza koronabirusaz gain beste hainbat gaixotasun ere artatu behar direlako baina bi aste pasatu dira dagoeneko COVID-19agatik azken pertsona ospitaleratu behar izan zenetik.