Udalako Ingurumen Eskoletan egun bateko egonaldia egin dute Arrasateko Lehen Hezkuntzako 1.161 ikaslek. Pandemiaren eta ingurumenaren arteko loturak aztertu dituzte eta herrian gizakiek egindako eraldaketak behatu dituzte: harrobiak, eraikuntzak, deforestazioa, egur landaketak…
Klima larrialdiari irtenbidea topatzen ere ahalegindu dira gazteak, eta horretarako Arrasateko Udalari hainbat proposamen egin dizkiote: aurrekontu gehiago jartzea ingurumena berreskuratzeko proiektuetarako; udalerriko natura eta errekuperatutako lekuak ezagutarazteko irteerak antolatzea; eukalipto landaketak egiteko zailtasunak jartzea; Udalaitzek daukan balio naturala babestea; herri barruko bidegorriak lotzea...
Horrez gain, ikasleak jakitun dira konpromiso batzuk ere hartu behar direla norbanako moduan, eta beste batzuen artean, honako hauek beteko dituztela adierazi dute: erabili eta botatzeko produktuak ez aukeratzea, elikagaiak nondik datozen eta nola eginda dauden begiratzea, bilduki gutxiago duten produktuak erostea eta herri barruan oinez, bizikletaz edo patinetez mugitzea.