Natur guneek ezohiko egoera honetan "balio erantsi berezia" eskuratu dutela-eta, eremu hauekiko hartu emana berreskuratzen jarraitzeko mezua zabaldu nahi dute Natura Jolasean ekimenaren antolatzaileek, espazio horien balio, begirune zein zaintzari garrantzia emanaz: "Gure askatasun zein aisialdiaren babesgune nagusi bilakatu dira natur gunean, horren adierazle argiak izanik azken aste-bukaeratan mendi inguruetan batu izan diren jende multzoak herrietako tontorretan, –Arantzazun, Araotzen, Urkiolan ...–, inoiz ikusi gabeko irudiak".
Aurten ere ekimenari eusteko "premia berezia" sumatu dute, eta ondorioz, badira jada aste batzuk 6. edizioaren prestaketa lanetan murgildurik dabiltzala. Gaurtik aurrera erronka bat zabalduko dute herrian, non, Zer da zuretzako naturan jolastea? galderari erantzuten saiatuko beharko diren gazte zein helduak, sormena, artea eta material anitzak baliatuz.
Ekintza ugari egun osoan zehar
Bi aste geroago, maiatzaren 29an zehazki, Naturan Jolasean eguna egingo dute Santa Barbara azpiko natur eremuan, hau da, Arimazubi gunearen parean: "Arrasatearrak familian, lagunartean edo eta bakarka beraien arte lanak, ekartzera animatuko ditugu, bertan jarriko dugun zuhaitz zintzilikarian lanak eskegi eta erakusketa kolektibo bat osatzeko". Lan honetarako, POOK artista elkarteko kideen laguntza ere izango dute.
Horrez gain, parte hartzea sustatzeko, animatzen diren herritarren artean, Berdean Heziko hiru otar zozketatuko dituzte, Olgetan jostailu dendaren eskutik. Egunean bertan bestelako ekintza batzuk ere eramango dituzte aurrera eremu beraren bueltan: goizean zehar Udalako Ingurumen Eskolako eta Guraso.eus proiektuko lagunekin batera, ibilbide gidatua egingo dute inguruko flora ezagutzeko asmoz. Bestetik, arratsaldean mural-collage erraldoi bat osatuko dute auzolanean, eta egunarekin amaitzeko, ekitalditxoa izango da hitzartze, zozketa zein talde argazkiarekin.
Jarraian, egitarau zehatza:
- 11:00etan, Erakusketa kolektiboa martxan jarriko dugu.
- 11:30ea, KaleNATURA ibilbide gidatua (Maiatzak 1 plazatik abiatuta).
- 16:00etan, “Mural-collage” erraldoia estilo libre-espontaneoan.
- 18:00etan, Naturan Jolasean ekitaldia.
Galdetegia eta bideoa
Eguzki zein euri, ekimenak aurrera egingo duela eta toki berean mantenduko dela nabarmendu dute antolatzaileek, baita deialdia adin tarte guztietara zabalik dagoela ere. Gainera, derrigorrezkoa izango da musukoa erabiltzea eta talde txikitan aritzea. Azkenik, asistentzia neurtze aldera, ondoko galdetegia bete beharko dute parte hartzaileek: https://labur.eus/naturanjolasean_izenematea.
Arte lanen sormena errazte aldera, eredu ezberdinak barne biltzen dituen ikus-entzunezko bat ere egin dute.
