Selekzio bakoitzak sei jokalari izan ditu eta hauen artean behintzat 14 urtez azpiko eta 18 urtez azpiko jokalari bana egon behar zuten. Osasun egoera dela eta, norgehiagokak Internet bidez jokatu dituzte, irudietarako Zoom plataforma eta partidetarako Lichess plataforma erabilita. Hegoaldeko selekzioan bi arrasatear egon dira: Haizea Tornay taldeko hirugarren taulan eta Josu Tornay selekzioko kapitain-hautatzaile lanetan.
Jardunaldiak 10:00etan hasi eta 14:30ak arte iraun du. Jokalari bakoitzak bi partida erdi-bizkor eta sei partida bizkor jokatu ditu guztira. Hegoaldeko selekzioak hasieratik menperatu du norgehiagoka; 46,5 punturekin irabazi du, Iparraldek 21,5 puntu egin dituelarik. Haizea Tornayk bere taldeko hirugarren emaitza onena eskuratu du, zazpi punturekin; hamarna puntu lortu dituzte Irati Laseca nafarrak eta Cecilia Perez gipuzkoarrak.
Jardunaldiok Baionako Udalaren eta Euskal Xake Federakuntzaren sostenguaz antolatu dituzte, eta egoerak baimentzen duenean hasiko dira norgehiagoka presentzialak jokatzen.
