Bere herrialdeko lagunek ea zertarako ikasten duen galdetzen diotela azaldu du, "bankuan edo autobusak konpontzen lan egiten duen beltzik" ezagutzen al duen argudiatuta: "Klasean nagoenean zalantzak ditut, ea merezi duen egunero lan egitea, ondoren ez badakit non amaituko dudan".
Europan sozialki maila ona lortu duten lagunak dituela gaineratu du, horiek ere arrazismoa sufritzen dutela salatuz: "Londresen lagun afrikar bat daukat, lan egin eta aberats bihurtu dena. Autoarekin doanean edo dendatan erosten duenean jendea harritu egiten da beltza delako. Ez al dugu ondo bizitzeko eskubiderik?".
Era berean, "amorrua" ematen dio komunikabideek Afrikari buruz "goseaz eta animaliez bakarrik" hitz egiten dutelako. Are gehiago, afrikarrek pasatzen duten gosea "ziur aski europarrek sortutako gerra batek eraginda" izaten dela azaldu du: "Toki gehienetan badago janaria, nekazaritzatik bizi garelako".
Ganbian bizitza sozial "ona" daramatela adierazi du: "Bizilagun guztiok ezagutzen gara elkar, oso irekiak gara, festetara edonor etor daiteke, berdin dio patrika beteta duen edo ez". Europan bezala, txikitatik heziketa bat jasotzen dutela aipatu du, eta ez duela ulertzen "zergatik sentitzen diren txuriak beltzak baino hobeak, ezagutzen ez bagaituzte?".
Gaztetxeko kideei eta entzuleei eskerrak emanez amaitu du hitzaldia, eta entzuleek ere eskerrak eman diote bere bizipenak "hain modu naturalean" kontatzeagatik.
