Osasun neurriak tarteko eta jende pilaketak saihesteko 48 laguneko bi multzo osatu dituzte gaur goizean Etxezarretara zuhaitzak landatzera joateko. 10:00etan abiatu da lehenengo taldea, eta 11:00etan bigarrena. Hala, duela egun gutxi erabat zurituta zeuden mendi magaletan landatu dituzte zuhaitz autoktonoak, eta biologoen azalpenak ere entzun dituzte bertaratutakoek. Pertsona bakoitzeko sei zuhaitz landatu dituzte, ezberdinak, baina denak bertakoak.
Herritar asko animatu da, goizeko lehen orduan, zuhaitzak erostera
Bestalde, zortzigarren urtez Zuhaitz Eguna egin dute Seber Altube plazan, baserritarren azokarekin batera. Hala, zuhaitzak erosteko asmoa zutenek goizeko lehenengo orduak aprobetxatu dituzte, eta eguerdian azokan batera eta bestera ibiltzeko eguzkiak gehiago berotzen bazuen ere, ordurako salmenta handienak eginak zituzten.