COVID-19ak bigarren aldiz kolpatu du Aita Menni, eta ELAk berriz salatu du ospitaleak egin duen kudeaketa: "Zoritxarrez, enpresaren arduragabekeriaren eta aurreikuspenik ezaren emaitza da hau. Guztiz onartezina da dimentsio honetako zentro batean langileek eta pazienteek prekarietatea maila honetan jasan behar izatea".
Ospitaletik adierazi dute sei direla unitatean kutsatuta daudenak, eta bestetik, azaroaren 5ean Benito Menni unitatean hautemandako kasuen harira, 34 egoiliar eta hamaika langile daudela kutsatuta oraindik. Horrez gain, hilaren 19an egoiliar bat zendu zela ere jakinarazi dute. Nolanahi ere, bi agerraldiek elkarren artean harremanik ez dutela azpimarratu dute, eta datozen egunetan PCR probak egiten jarraituko dutela.
Sindikatuarentzat lotura dute kasuek
Ospitaletik adierazitakoaren kontrara, ELAk esan du langileak hainbat unitatetan lanean aritu direla "pertsonal faltarengatik" eta horrek "unitate guztiak arriskuan" jarri dituela: "Konfinatu aurretik, konfinatu bitartean eta ospitalean bi agerraldi izan ondoren ere langileak batetik bestera ibiltzen dira. Bigarren agerraldiak lotura zuzena dauka langileak unitate desberdinean aritzearekin".
Bestetik, "pertsonal falta", "neurri zehatzen gabeziak" eta Aita Menniko "lan-baldintzen prekarizazioa" ere salatu dituzte ohar bidez, eta Eusko Jaurlaritza eta Aldundira jo dute "hitzetatik ekintzetara" igaro daitezen eskatzeko. Bestetik, langileei mobilizatzeko dei egin diete.
