Arrasateko Udalak Biteri Plazako argiteria eraldatuko du jasangarriago bihurtzeko. Guztira 13 argi puntutan burutuko da aldaketa, baliza motako farolen luminariak LED teknologiara egokituz. Inbertsioa 6.549,81 eurokoa izango da eta muntaia-lanak Udal Brigadak burutuko ditu datozen asteetan.
Udalaren esanetan, "argiztapen-sistema berrien instalazioek energia-eraginkortasuna hobetzea dute helburu, lehendik daudenen ordez energia-kontsumo murritzagoa eta ingurumenarekiko begirunea dakarten beste batzuk jarriz eta jasangarritasun-ereduan sakonduz".
2016tik, 470.000 Kwh-eko aurrezpena
Energia Jasangarriaren eta efizientzia energetikoa Hobetzeko Ekintza Planarekin, 2500 luminaria baino gehiago Led teknologiaz aldatzea lortu da azken urteetan, baita lanparetan kontrol adimenduneko sistema berri bat txertatzea ere , haien intentsitatea erregulatzeko
aukera ematen duen hargailu batekin. Kontsumo-datuak denbora errealean eskaintzea ere ahalbidetu da horrela. Argiteria publikorako 72 aginte-koadro daude Arrasaten.
2016a eta 2020a alderatuz, azken hau urtarriletik abuztura bitarte, diru aurrezpena 42.164 eurokoa izan da. 2016an 171.388 euroko kostua izan zuen argi-kontsumoak, 2019an 158.528 eurokoa, eta 2020an 129.224 eurokoa.
Kontsumoak 462.569 kilowatt ordu (Kwh) egin du behera, 2016ko 1.338.696 Kilowatt orduetatik 2020ko 876.127 kilowatt orduetara. 2019an 1.094.026 ilowatt ordu kontsumitu ziren.