Egurra, harriak, berrerabilitako materiala... Horiek guztiak eta gehiago izan dituzte gaur jostailu Arrasateko Biteri plazan batu diren umeek. Ibai Artek antolatutako Merkataritza Berdearen astearen barruko ekimena izan da, eta Txatxilipurdi arduratu da jolasak prestatu eta dinamizatzeaz. Egungo egoerara moldatutako ekitaldia izan da gainera: edukiera mugatua, guneak adinaren edo jolas motaren arabera hesituta, garbitasunerako materiala...
"Gustura gaude, umeek parte hartu dutelako", azaldu du Ibai Arteko Arantza Arantzabalek. Gaurkoa ez da Merkataritza Berdearen asteari Arrasateko merkatariek egindako keinu bakarra izan; izan ere hainbatek material ekologikoarekin edo berrerabilitakoarekin apaindu dituzte erakusleihoak egunotan.