Urritik abendura artean egingo dituzten jardueren aurkezpena egin du Emakume Txokoak. Askotariko ikastaroak antolatuko dituzte, eta bertan behera geratu zirenei ere jarraipena emango zaie. Berrartuko direnak izango dira: zoru pelbikoa indartzeko ikastaroa, mindfulness ikastaroa, mekanika ikastaroa, jendaurrean hitz egiteko ikastaroa eta "gorputzak eta disidentziak klabe deskolonial eta transfeministatik" tailerra.
Bestetik, ikastaro berriei dagokienez, askotariko eskolak prestatu dituzte, betiere emakumeak "haien eskubideen jabe egiteko" eta "sareak sortzeko" helburuarekin. Bestetik, jakinarazi dute COVID-19ari aurre egiteko segurtasuna bermatuko dela, eta "denak gustura sentitzeko" neurriak hartuko dituztela.
Sei proposamen berri
Antolatzaileen esanetan, ikastaro berriak hiru multzotan sailka daitezke: osasuna eta gorputza batetik, aisialdia, kultura eta sormena bestetik, eta bukatzeko, feminismoa. Izen-ematea irailaren 21ean zabalduko da eta 25ean amaituko da, eta ikastaro bakoitzak matrikula-tasa desberdinak ditu; Emakume Txokoan eman behar da izena (bertara joanda, e-mailez edo telefonoz).
Boxeo ikastaroa
Astelehenetan izango da, urriaren 5etik aurrera, euskaraz, 18:30etatik 19:30etara. Zortzi saio izango ditu guztira eta adierazi dutenez, ikastaroaren helburua emakumeak "indartsu" sentitzea da, abiadura, koordinazioa eta indarra landuz.
Autoestimua eta ahalduntza ikastaroa
Urriaren 6tik aurrera ekingo diote, eta gaztelaniaz izango da: martitzenetan, 18:00etatik 20:00etara. Hamar saio izango ditu guztira. "Tailer honek gune bat izan nahi du Covid-19aren krisi honetan bizi izan duguna partekatzeko, gertatutakoa ulertzeko, kausak aztertzeko eta nahi dugun mundua irudikatzeko", azaldu dute.
Chi Kung ikastaroa
Gorputzarekin "berriro konektatzea" bilatzen du ikastaro honek, azaldu dutenez, bizi energia areagotzea, estresa gutxitzea, gorputz egitura hobetzea eta emozioak orekatzen laguntzea lortu nahi da. Eguenetan izango da, euskaraz eta gaztelaniaz, 10:00etatik 11:30etara. Urriaren 8an emango zaio hasiera eta hamar saio izango ditu guztira.
"Zaindu eta maitatu zure gorputza"
Gaztelaniaz izango da egubakoitzetan 10:00etatik 11:30etara, urriaren 9an hasita. "Ikastaro honen bidez gune bat eskaintzen dizugu geure burua zaintzeko eta goxatzeko", esan dute. Arnasketa ariketak, meditazioa, luzaketak eta bestelako ariketak egingo dira Yoga eta Feldenkrais tekniken bidez.
Sormen tailerra
Sormen tailerra urriaren 6an hasiko da eta 10 saio izango ditu: martitzenetan, 18:15etatik 20:15etara. Besteak beste, idazmena, marrazketa edota collagea bezalako teknikak erabiliz, emozio bilduma bat sortu nahi dute.
Teknologia berrietan trebatzeko ikastaroa
Sare eta teknologia berrietan trebatzeko ikastaroa, berriz, gaztelaniaz izango da, 10:00etatik 13:00etara, urriaren 17an. "Genero arrakala digitalari aurre egiteko, komunikazio digitalean trebatzeko baliabideak ahalik eta egokien erabiltzen ikastea da ikastaroaren helburua", azaldu dute.
Gune iraunkorrak, bestelako helburuekin
Jabetze Eskolako ikastaroez gain, gune "iraunkor eta feministak" sortzeko helburuz, bestelako proposamenak egin ditu Emakume Txokoak. Alde batetik, amatasunaren inguruan hausnartzeko gunea eratu nahi dute: hiru saio izango ditu (urriak 31, azaroak 28 eta abenduak 12) eta euskaraz izango da, 10:00etatik 13:00etara. Bestetik, Arrasaten bizi diren emakume etorkinak elkartzeko xedez, domeketan jarriko dute hitzordua 10:00etatik 13:00; Luciana Alfaro izango da dinamizatzailea. Eta hirugarren gunea irakurketa feministen txokoa izenekoa izango da.
Bestelako ekintzak Emakume Txokoan
Urriaren 15ean, Malen etxea. Zaintzaren esklabo dokumentalaren emanaldia eta solasaldia egingo da Kulturateko Areto Nagusian, 18:30ean, eta 29an, Zinegoak Hedapena film laburraren emanaldia egingo dute toki berean, 19:00etan.
Bestetik, azaroaren 25era begira, ekintzak egingo direla aurreratu dute, eta abenduan Mabel Medina Valenzuelaren Complicidades argazki erakusketa egongo dela ikusgai.
