Herrian aurrez aztertuta jarri dituzten 62 tranpek iaz baino 1.342 liztor gehiago harrapatu dituzte. Aurtengo datuak iazkoak baino “nabarmen” altuagoak direla esan dute, eta hori igaro den “negu bigunaren” ondorioa dela.
Azaldu dutenez, harrapatutako liztor kopuruak “agerian” utzi du gurera etorri berri den espeziea “eroso” egokitu dela –ugaltzeko gaitasuna ere izan baitu–. Udalak herritaren kolaborazioa eskatu du, hemendik aurrera, inguruan atzematen dituzten kabi edo mugimenduen berri emateko. Udaltzaingoari (943 25 20 10), Udal teknikariari (628 11 56 73) edo Biztanleen Arreta Zerbitzura (943 25 00 00) deitzea gomendatu dute.
Ugalketa kontrolatzeko ikerketa
Jasotako datuak Aldundira bidaltzen ditu Udalak, eta ondoren estatistikak ateratzen dituzte espeziearen ugalketa kontrolatzeko ikerketetan laguntzeko. Zein tokitan eta zein garaitan harrapatu diren adierazten dute, eta egoera klimatologikoa ere kontuan hartzen da.
Liztor beltzaz gain, beste zein espezie harrapatzen den ere aztertzen dute, horrela, bertako liztor eta gainerako intsektuei ahalik eta kalte gutxien eragiteko. “Kontuan izan behar da, Vespa Velutinak bezala, bertako espezieak ere, negualdiaren ostean orain dutela irten eta beraien koloniak egiten hasteko garaia”, esan dute Udaleko ordezkariek.