Zaintza Sare Herritarrak elkarlanean aritzeko eta egoera honetan dauden zaintza beharrei modu komunitarioan erantzuteko helburua daukala ohartarazi dute. "Elkarlana ez da batek eskatu eta besteak ematea, baizik eta elkarrekin egoerak aztertu, eta lankidetzan erantzunak ematea. Guk horretan sinesten dugu eta horretan ari gara, gure denbora, indarra eta konpromisoa egoera honi modu komunitarioan erantzuteko ahaleginean jarriz".
Era berean, Udalari eskatu diote "zerbitzuak hartu-emateko" logikatik "elkarlanaren eta benetako auzolanaren" logikara pasatzeko ahalegina egin dezala. "Elkarlanean ez dago hierarkiarik. Denon arteko elkarlana da, edo ez da elkarlana, eta ez da bidezkoa udalak ekimena bere egitea eta protagonismoa eskuratzeko baliatzea".