Gobernuari eskatu diote lehenbailehen har dezala jaiak bertan behera uzteko erabakia, eta formatu berriak pentsatzen hasteko, betiere, osasun larrialdiak eskatzen dituen segurtasun neurriak betez: publiko mugatu batekin, adibidez.
San Juan jaietan erabiltzen ez den dirua beharrak dituztenei bideratzea "egingarria" dela diote –kreditu espediente aldaketen bidea aipatuz– eta horretarako "borondate politikoa bakarrik" behar dela diote.
"Ezker-anitzatik egoera gogor hau lehenbailehen pasa dadila nahi dugu, gure komertzioa, ostalaritza, paisaiak eta jaiak lehenbailehen gozatzen hasteko" azaldu dute gaztelera hutsean komunikabideei igorritako oharrean.
Ezker Anitza Elkarrekin Arrasate koalizioko alderdietako bat da, eta zinegotzi bateko ordezkaritza dute Arrasateko udalbatzan. Koalizioa osatzen duen Ahal Dugu alderdiak ez du oharra babestu, eta horregatik sinatzen dute Ezker Anitza bezala.
