Eider Mendoza foru bozeramaileak jakinarazi du, gainera, bi lagun hil direla lurraldeko egoitza sarean azken orduetan, Eibarko Egogainen eta San Andresen hain zuzen ere, eta beste hiru lagunek eman dutela positibo. Hori horrela, Gipuzkoan 65 egoitzetatik 16k dituzte kasu positiboak, 127 alta daude guztira, 148 heriotza eman dira eta 259 lagunek diagnostiko positiboarekin jarraitzen dute. Horietako 37 Donostiako Gurutze Gorriaren zentroan daude ingresatuta eta 33 ospitaleratuta.
Desgaitasuna duten pertsonentzako egoitzen kasuan, diagnostiko positiboa zuten bi lagunetatik batek mediku alta jaso du, Donostiako Uliazpiren zentroko egoiliarrak. Eta orain, pertsona bat dago kutsatuta, Donostiako Iza egoitzan.
Egoitzetan egiten ari diren "lan nekaezina" eskertu gura izan du beste behin Mendozak.
