Arrasateko zaintza sare herritarrak adierazi du, konfinamenduarekin sistemak aurretik zituen hutsune eta gabeziak larriagotu direla eta agintarien ekintza eta elkarlana faltan sumatzen dituela. Hala ere, aipatu du, egindako ibilbideak komunitatearen garrantzia berresteko balioko duela eta gogorarazi du gizarteak elkarren beharra duela eta elkar zaintzeko prest dagoela.
Herrian dauden premiak askotarikoak direla jakinarazi du sare herritarrak: bakartutako bizilagunak, diru-sarrera gabe gelditu direnak, bortizkeria giroan daudenak, eskolako lanekin zailtasunekin dabiltzana, herrikideen salaketak jasaten dabiltzanak eta oinarrizko beharrak asetzeko baliabiderik ez dutenak, besteak beste. Horregatik, norbere bizitza eta ondokoena balioan jarrita, elkar zaintzeko garaia dela aldarrikatu du.
Laguntza eskatzeko telefonoak
Arrasateko zaintza sare herritarrak hiru telefono zenbaki jarri ditu eskuragarri: erosketa zerbitzurako (697 972 222), zaintza zerbitzurako (602 641 990) eta psikologia zerbitzurako (622 483 247).
