Koronabirusaren krisi betean, badaude atsedenik hartu ezin dezaketen zerbitzuak. Ospitaleak dira nabarmenenak, baina talde berean daude, besteak beste, elikadura dendak, farmaziak edota zaharren egoitzak. Zerbitzua ematen jarraitu dute baina batzuek neurriak hartu dituzte.
Eguerdian Iñigo Urkulluk iragarri du, senideen bisitak murriztu egingo dituztela; Iturbiden, ordea, harago joan dira eta ez da bisitarik egongo apirilaren 1era arte. Egoitzako langileek maskarilla bezalako babes neurriekin lanean dabiltza eta egoiliarrek uneoro higiene neurriak bete ditzatela bermatzen ari dira.
Elikadura dendatan normaltasuna nagusi. Jende mugimendu handia izan goiz osoan zehar, eta apalak nahiko ondo hornituta zituzten denek. Okindegien kasuan ere jende ugari, eta ilaratan segurtasun distantziak mantendu dituzte erosleek, irudietan ikus daitekeen bezala. Gauza bera farmazietan ere. Erosle asko elkartu dira une batzuetan, baina metro edo metro eta erdiko distantziak mantendu dituzte euren artean.