Txapelketa "nahi bezala" atera ez zitzaiola onartuta ere, bertara iritsi arte egindako lanean eta lan horren balioan jarri du fokua atleta arrasatearrak: "Pista estalian oso ondo aritu naiz eta txapelketa honetan denboraldia errematatu nahi nuen. 4,32an bi jauzi nulo egin eta gero –irabazleak bigarrenean pasatu zuen–, hirugarren saiakera 4,38rako erabili nuen. Hori izan zen estrategia, hor zegoen irabazteko aukera. Arriskatu egin nuen eta ez zen ondo atera. Nahi nuen emaitza ez izan arren, hotzean pentsatuta, neguko denboraldiaren balorazio positiboa egiten dut. Inoizko neguko denboraldirik onena izan da".
Orain, egun batzuetan atseden hartuko du Ruiz de Azuak, eta gero entrenamenduetara itzuliko da aire zabaleko txapelketak prestatzera: "Nire marka pertsonala (4,40) hobetu nahiko nuke; horrek txapelketa handietan sartzeko ateak irekitzea espero dut".
