Urte emankorra izan da 2019a Mondravember taldea osatzen dutenentzako. Arrazoi askorengatik: mugimendua gero eta errotuago dagoelako herrian, antolatutako ekintzak eta sinergiak ugaritu direlako, eta baita batutako diru kopurua hirukoiztea lortu dutelako.
2017tik, hazten
2017an hasi ziren Mondravember bezala funtzionatzen. Aurretik pare bat ekitaldi egin zituzten Movember bezala, baina batutako dirua nora bidali euren kabuz erabakitzeko talde propioa sortu zuten urte hartan. Lehen ekitaldian 350 euro batu zituzten errifak eta bestelakoak saltzen, 2018an mugimenduak hazkunde bidean jarraitu zuen, eta horren adibide izan zen batutako dirua ere. 1.200 euro batu zituzten, aurreko urteko kopurua baino hiru aldiz pasatxo gehiago. Diru hura Derion dagoen CIC Biogune ikerketa zentrora bideratu zuten; konkretuki, Arkaitz Carracedo ikerlariak prostatako minbiziaren aurka daraman ikerketara.
Mondravemberreko kideak ez dira lortutakoarekin konformatzen eta 2020an hazten jarraitzeko ideia berriak dituzte
Eta aurten ere hazkunde maila bera mantendu dute. 4.000 euro batu dituzte; 2018an batutakoa hirukoiztu, eta 400 euro pasa. 2020an iazkoa hirukoiztea helburu duten galdetuta, hona taldeko kide Iban Arroiaberen erantzuna: "Ondo legoke berriz hirukoiztea; ez dakit lortuko dugun, baina badakit gure esku dagoen guztia egingo dugula ahalik eta gehien batzeko. Aurten, adibidez, errifez gain, ekintza berri bat abiatu zuen Hoba tabernak, eta ondo funtzionatu du. Pintxo-potean garagardoa bi eurotan mantendu zuten, garagardo bakoitzeko euro bat Mondravemberri bideratzeko".
Ikusgarritasunaren garrantzia
Dirua garrantzitsua dela dio Arroiabek, baina are gehiago ikusgarritasuna. "Batzen dugun diruari inongo garrantzirik kendu gabe, garrantzitsuagoa iruditzen zait gaiari ematen dion ikusgarritasuna. Arkaitz Carracedoren eta bere lankideen ikerketak kostu ekonomiko itzela du. Ekarpen ekonomikoa egiten dugu, gero eta handiagoa dena, baina, eurek esanda, gaiari ikusgarritasun handia ematen diogu, eta hori asko eskertzen dute".
Arkaitz Carracedo –eskumatik, bigarrena– eta CIC Bioguneko lankideak, Mondravember taldeak egindako ekarpen ekonomikoa jasotzen duen diplomarekin. (Argazkia: CIC Biogune)
2020rako ideia berriak
Mondravemberkoak ez dira lortutakoarekin konformatzen eta hazten jarraitu nahi dute. Aurtengo ekitaldira begira, badituzte, jada, ideia berri batzuk: herri kros bat egitea, eskoletan hitzaldiak egitea minbiziari buruz eta enpresen ekarpen gehiago lortzea, besteak beste.
