Istripu horren harira, sindikatuak Grupo Avanza taldeko Pesa enpresak Arrasaten dituen instalazioen "baldintza eskasak" azaleratu nahi izan ditu. Autobus-tokia "oso txiki" geratu dela salatu dute; autobusak gero gehiago eta handiagoak direla esan dute, eta ondorioz, "espazio arazoa arrisku larria izaten" hasi dela.
LABen hitzetan, ezbeharra espazio murritzak eragin du: "arrazoia da ez dagoela maniobratzeko lekurik, eta beti egon behar dugu gutako bat lankideari laguntzeko, autobusa atera eta sartu ahal izan dezan".
Istripua izan zuen langilearen egoerari dagokionez, uneotan ZIUn –Zainketa Intentsiboetako Unitatea– (UCI gaztelaniaz) dagoela azaldu dute: "Arriskutik kanpo, baina pelbisa eta hainbat saihets hautsita ditu. Ospitaleko mediku taldea Donostiako ospitalera eramatea baloratzen ari da".
GOIENA Pesa taldearekin harremanetan jarri da lan-istripuari buruz galdetzeko, baina jaiegun hauetan informazio hori eman dezakeenik ez dagoela azaldu dute bulegotik.
Arrasateko autobus gordelekua
Abenduaren 13an izandako lur-jausiak autobus gordelekuan eragindako kalteei buruz ere hitz egin du sindikatuak. Azaldu dutenez, "enpresak ez du arazo hori oraindik konpondu", eta "gero eta baldintza okerragoetan" daudela nabarmendu dute.