Duela 30 urte baino gehiago aikidoarekin txundituta geratu zen Jose Matas. "Garai hartan, kung-fu irakasle nintzen, eta Donostian egindako nazioarteko jardunaldi batzuetara joan nintzen. Fisikoki oso ondo prestatuta egotea eskatzen du kungfuak, eta momentu hartan oso oso indartsu nengoen. Hala, jardunaldien barruan, ni baino zaharragoa eta ahulagoa zen aurkari batekin lehiatzeko aukera izan nuen, eta bizitza osorako lezio bat eman zidan. Munduko indar guztiarekin erasotzera joan nintzen, eta apenas indarrik erabili gabe lurrera bota ninduen. Esan nion nire buruari: zer demontre egin du tipo horrek ni hala menderatzeko? Ba, erantzuna aikidoa zen".
Yasunary Kitaura zuen izena japoniar jatorriko borrokalari hark, eta harekin harremanetan aritu zen Matas, diziplina horretako irakasle izan ahal izateko. "Hark emandako kurtsoetara joan nintzen, Madrilera, Zaragozara, Frantziara... lau eguneko kurtsoak ziren, egunero bost ordu saioak... Hainbat kurtso egin ostean, inguruko japoniar elkarteek erabaki zuten banuela maila nahikoa irakasle jarduteko".
Buru azkarra, indarraren ordez
Behin irakasle izateko bermeak jasota, 1989an Musakolako kiroldegian hasi ziren Matas eta konpainia aikidoa jorratzen. Esaera zaharrak honela dio: Anitz balio du indarrak, gehiago buru azkarrak. Eta aikidoa horren erakusle garbia dela dio Matasek. "Kung-fuan fisikoki hobeto dagoenak lortzen du irabaztea, orokorrean, baina aikidoak ez du horren beharrik. Funtsean, bi oinarrizko zeregin ditu aikidoak: kolpeak xurgatzea eta aurkaria desorekatzea. Hori lortzeko tekniketan sakontzen duen arte martziala da".
Aikidoa, emakumeak babesteko
Emakumeen aurkako biolentzia kasuek eraginda, ABAE elkartea –aikidoa barne dago– doako autodefentsa feminista ikastaroak antolatzen hasi zen, emakumeak defentsa gaietan ahalduntzeko. "Aikidoa oso eraginkorra da emakumeen defentsarako, batez ere, orokorrean erasotzaileek eurek baino indar handiagoa edukitzen dutelako. Bi urte daramatzagu hilero doako tailerrak eskaintzen, eta beharrezkoak dira, errealitate oso latzak dituzten emakumeak daude eta".
Zapatuan ospakizuna
30. urteurrena ospatzeko, zapatu goizean lan-saio jendetsua egingo dute, eta ostean, poteotxoa, bazkaria eta hitzaldi bat ere.