"Oso kezkaturik". Espresio hori erabili du Arrasateko EH Bilduk Arrasateko Udaltzaingoak bizi duen giza baliabide falta nola bizi duten azaltzeko. Egoera deskribatzeko orduan, hiru arazo nagusi identifikatu dituzte: udaltzain falta, udaltzain postuak betetzeko Arkauteko lan-poltsa erabiltzeko hitzarmena eta, azkenik, goi-kargudun udaltzain izateko hautaketa prozesuan "Ertzaintzari ateak irekitzea".
Udaltzain falta
1449/2018 errege dekretuak eragin berri du bost udaltzainek erretiroa hartzea, eta horren aurrean honako irakurketa egin dute: "lehen esaten bagenuen udaltzain nahikorik ez zegoela udaltzain nahikorik lan egiteko, pentsa orain bost hutsune gehiagorekin. Arrasate ezagutzen ez duten aldi baterako langileak dira nagusi udaltzaingoko ekipoetan. Txanda batzuetan, hutsuneak ez dira bete ere egiten eta egon beharreko udaltzainen azpitik ari dira lanean".
Arkauterekin hitzarmena
Une honetan Eudelek Arkauterekin osatzen duen lan-poltsa, eta baita udal lan-poltsa hutsik daudela salatu dute. Azken honekin lotuta zera adierazi dute: "nahiz eta orain lan-poltsa bat atera, presaka, etxeko lanak egin gabe izatea ordainduko dugu. Pentsa nolakoa den egoera, sindikatuek salatu dutela Arkautetik bidaltzen aritu direla lan-poltsa gainditu ez zuen jendea ere".
[ELAren oharra irakurtzeko, egin klik hemen]
Bi proposamen
Egoera zein den deskribatu ostean bi proposamen egin dizkiote Udal Gobernuari. Lehena, osoko bilkuran egin bezala, goi-karguko udaltzainen hautaketa EAEko administrazio osora zabaltzeko prozesua bertan behera uztea, udaltzain "ereduaz sakon hitz egin arte". Eta bigarrena, eztabaida publiko bat egitea alderdi guztiekin.