Aldundiaren ekimen hori Arrasaten, Azpeitian eta Eibarren jarriko da abian, eta otsaila eta apirila bitartean garatu. Hainbat gai jorratuko dituztela proiektu horren bueltan jakinarazi dute: lana, ohiturak, manifestazio kulturalak eta jaiak, baita ondare soziokultural material zein materiagabea osatzen duten elementuak ere. Memoriak izeneko ekimen horren berri eman du gaur, otsailak 4, Denis Itxaso Kulturako diputatuak Arrasateko alkate Maria Ubarretxenarekin, Azpeitiko Eneko Etxeberriarekin eta Eibarko Miguel de los Toyosekin batera. "Kulturak gizarte kohesiorako tresna ere izan behar du, eta, Memoriak, aurrerapen bat da norabide horretan", adierazi du Itxasok.
Kooperatibismoaren gaineko kontuak Arrasaten
Arrasaten kooperatibismoaren memoria dokumentatuko da, besteak beste. Eta jasoko dira, hala nola, kooperatibismoarekin zerikusia izan duten pertsonak eta balioak, herriko ongizatean izan diren giza zein hirigintza aldaketak, enpresekin zein horien jarduerekin dagoen harremana, herriaren ongizatean izan duen ekarpena eta partaidetza erlazioa.
Trebakuntza jaso
Lantegietan 15-20 bat pertsonen parte-hartzea gura dute. Horretarako trebakuntza jasoko du talde horrek; lurraldea mapatzen eta narratiba digitalak zein edukiak sortzen irakatsiko diete. Eduki horien sorkuntza tresna telefono mugikorrak izango dira. Lantegiek 12 ordu inguruko iraupena izango dute eta trebakuntza zein edukien sorkuntzak sesio desberdinetan banatuak izango dira. Izena emateko hona hemen bideak: Info@kulturmemoriak.eus eta 622 82 51 13. Lanean hasi aurretik aurkezpen bat egingo dela aipatutako herri bakoitzean iragarri dute Aldundiko ordezkariek, boluntarioak biltzeko.
