Hezkuntza eta promozio izaera duen 31. Gipuzkoako akordeoi jaialdia egin zuten atzo arratsaldean Amaia Antzokian. Hainbat kontserbatorioetako eta musika eskoletako ikasleak izan ziren antzokiko taula gainean. Eskolan eta etxean praktikatzen dutena "ikusleen aurrean eskaintzeko aukera ona" izaten da Arrasateko jaialdia. Bada, atzokoan gustura geratu ziren bai ikasleak eta baita gurasoak ere. "Maila ona" egon zela adierazi zuten ekitaldiaren amaieran.
Bakarlariei, ganbera musika taldeei eta talde handiei irekitako jaialdia izaten da. Horren araberan egiten dute sailkapena.
Hamaika maila
Hauspoz elkarteko Aitor Furundarenak aurkeztu zuen ekitaldia. Sariak ere banatu zituzten: brontzezko dominak, zilarrezko dominak eta urrezko dominak. Hastapena A, B eta C mailak; A, B, C eta D kategoriak; Ganbara musika1, 2 eta 3; eta, talde handiak. Horiek izan ziren hamaika mailak.
Oinarrizko pedagogiaren osagarri
Musika eskoletako oinarrizko pedagogiaren osagarri da jaialdia. Kantu ezagunak, herrikoiak eta klasikoak, denetarik entzuteko aukera egon zen. Kataluniatik etorritako gaztetxo batek, esaterako, Doraemon abestia jo zuen, eta ikusleak hunkitu zituen.
Nazioarteko lehiaketa eta Gipuzkoako lehiaketa
39. Gipuzkoako akordeoi lehiaketa jokatuko dute gaur: 9:00etan gazteek eta 15:00etan nagusiek Kulturaten, eta 9:30ean haurrek Arizmendi ikastolan. Azken ekitaldia eta sari banaketa 20:00etan izango da Amaia Antzokian.
Arrasate Hiria Nazioarteko 26. akordeoi lehiaketa, aldiz, Amaia antzokian jokatuko dute goiz eta arratsalde. Sari banaketa ekitaldia 20:00etan izango da, Amaian.