Arrasateko musika taldeen pultsua nahiko baxu dagoen momentu honetan, badaude argi izpiak eta itxaropenerako zantzuak ere. Eta horietako bat, ezbairik gabe, Perlata taldea da.
2015ean sortu zen, ondorengo taldekideekin: Ane Garai –gitarra–, Jaione Martinez –gitarra eta biolina–, Ander Moreno – bateria– eta Maialen Oleaga – baxua eta ahotsa–. Baina musikaren mundua ez zen berria eurentzat, aurretik Lost Girls, Interprete Desconocido, Neallta Fola eta No Ways taldeetan jotako musikariak ziren eta.
Jarrera propioa
Nagusiki emakumeek osatutako taldea izateak berritasun puntua eman zion Perlataren agerpenari. Baina ez zen taldearen bereizgarri bakarra izan. Biolina eta halako instrumentuak erabiltzeagatik, kritikarako eta autokritikarako letrak idazteagatik, abesti propioak denbora laburrean sortzeko gaitasunagatik eta zuzenekoetan taularatzen zuten irudiagatik eta jarreragatik eman zuten zeresana.
Ibilbidearen lehen zatian konposatutako abestiekin Nondik hasi? izeneko lehen diskoa kaleratu zuten, 2017ko martxoan. Berlineraino ere iritsi ziren lehen diskoko kontzertuekin, eta Hatortxu Rock jaialdiak antolatutako Lilaketa lehiaketako irabazle izan ziren. Sari gisa disko berri baten grabaketa jaso zuten, eta jada kalean dago: Urrezko kaiola du izena, eta sei abestik osatzen dute.
"Lehen diskoa ateratzeko, lan handia egin genuen aurretik, eta diskoa grabatzearena begiz jota genuen. Baina bigarren hau beste modu batean etorri da. Ez genuen espero Lilaketa txapelketa irabazterik, baina hala suertatu da. Beraz, kaxoian gordeta genituen abestiak hartu, eta berriz abiatu gara Lorentzo Records estudiora, lehen diskoa grabatu genuen leku berera", azaldu du taldeko abeslari Maialen Oleagak.
Disko berria
Ezarritako arauen aurkako gerra, rockaren indarra, plazera bilatzeko ausardia, itxurakeria... askotariko gaiak landu dituzte disko berriko abestietan, orain arte izan duten ukitu kritikoari eutsiz. "Abesti guztiek dute mezu bat. Ez dakit mezuak helarazten saiatzen garen edo, besterik barik, barrutik ateratzen zaigun". Diskoari izenburua eman dion Urrezko kaiola abestiak, adibidez, keinu garbia egiten dio sare sozialek agintzen duten gizarteari eta bertan bizi den itxurakeriari.
"Guretzako, Urrezko kaiola izenburu borobila da, hainbat egoeratan aplikatu daitekeelako. Letran, sare sozialek eragiten duten atentzio goseak eta azaleko bizitzak aipatzen ditugu, baina baditu beste hainbat dimentsio ere. Hainbat egoeratan eta erlaziotan aldatzeko beharra sentitzen dugu, eta kaiola mota asko daudela esango nuke. Indarra eta esanahia du, eta horregatik jarri diogu titulu hori diskoari".
Bateria jole berria
Taldean aldaketa bat izan berri dute. Ander Morenok grabatu zuen diskoa, baina orain, Harri Anzizar da taldeko bateria jolea. Hainbat taldetan aldi berean aritu izan da orain arte, eta segituan moldatu da talde berrira.
Kontzertuen txanda
Osorik tabernan aurkeztu zuten diskoa, ekainaren 24an, eta orain, ahalik eta kontzertu gehien jotzean jarriko dituzte indarrak. "Diskoa zabaltzeko, kontzertuak emateko eta, batez ere, ondo pasatzeko ordua heldu zaigu".