Bi urtean behin egiten duten Txalaparta Eguna antolatu dute datorren zapaturako, uztailak 7. Herriko txalapartarien doinuez gainera, Aramaioko, Aretxabaletako eta Zumarragako txalaparta taldeetako kideenak entzuteko aukera ere izango da herriko txoko ezberdinetan, 18:00etan hasita; 20:00etan, berriz, Iruñeko Hutsun taldeak emanaldia egingo du Herriko Plazan. Hala ere, adituak edo arituak ez direnek ere izango dute egurrezko oholari soinua ateratzeko aukera ere: 11:30etan hasita, saio libreak izango dira-eta Herriko Plazan.
Herri-bazkaria egingo dute 14:30etan Udalpe elkartean –txartelak 17 eurotan salduko dituzte egunotan egingo dituzten hitzaldietan–.
Erakusketa eta hitzaldiak ere bai
Lorentzo Altube arrasatearra zenak euskal musika tresnen bilduma polita zuen etxean, gerora Eskoriatzako Ibarraundi museora eraman zutena, eta bihar, martitzena hasi eta eguena bitartean, Kulturateko Jokin Zaitegi gelan izango da mostra bat ikusgai.
Txalapartaren inguruan gauza berriak ikasteko asmoarekin bi hitzaldi ere antolatu dituzte Ttakun taldekoek: bihar, martitzena, txalapartak nola egiten diren azalduko du Jotzen Perkusioak elkarteko kideak, 18:30ean Jokin Zaitegi gelan hasiko duen berbaldian. Etzi, eguaztenean, berriz, Zurartean txalaparta elkarteko kide Sergio Lamuedrak, Txalapartaren idazkera eta adibideak berbaldia eskainiko du toki eta ordu berean.
